ORIENTACIÓN AL USUARIO

Urria ate-joka dugu jada, eta gutxi barru estreinatuko dugun hilabetean ere Kooltur Ostegunek ez dute hutsik egingo.  Ekimen honen antolatzaileek egitarau oparoa antolatu du urteko hamargarren hilabeterako, eta, honen baitan, guztira lau talde izango dira Arrasateko Gaztetxeko agertokira igoko direnak.

Aurreneko hitzordua Maritxu Kajoiren bezpera izango dugu, urriaren 4an, hain justu ere.  Egun horretan Lisabö talde irundarra izango da emanaldia eskainiko duena, ohikoa den moduan gaueko 22:00etan hasita.  Iaz bezala, aurten ere sarreraren prezioa 5 eurotan finkatu dute antolatzaileek.

Bigarren kontzertua astebetera izango dugu, hilaren 11n, eta egun horretan flamenko zein txalaparta doinuek bereganatuko dute protagonismoa.  Izan ere, kasu honetan hainbat talde izango dira  Gaztetxeko agertokira igoko direnak:  Askoa, “La pulga”, Raquel Cabello, Simon Moreno …

Azkenik, urriko beste bi kontzertuak hilaren 18 eta 25ean izango dira.  Aurrenekoan Galiziako punk-folk zein gaita doinuak izango ditugu, Bastard On Parade taldearen eskutik.  Bestetik, hilabeteko azken Kooltur Ostegunean Glaukoma tolosarrek eskainiko dute kontzertua, reggae eta rap doinuekin Gaztetxea zipriztinduko dutenak.